هنبدأها بصورة وكلمتين والاتنين بالمفتشر وبصريح العبارة عن العلاقة الغريبة ما بين الصمت الانتخابي وما بين الدعاية الانتخابية.. الأصل في الموضوع إنهم متخاصمين ولا ممكن ابداً يتلموا على بعض وما فيش مكان يساعهم هم الاتنين: إكمن الصمت مالوش حس والدعاية صوتها عالي وعلى كل شكل ولون!!! طيب!!! أما عن الصورة فمش محتاجة قوالة وتسد عين الشمس.. واما عن الكلمتين: فاشوف كلامك اصدق ان قرار اللجنة العليا للانتخابات لازم يصير وان لا كلمة ولا حرف ولا حس ولا خبر يعلو على صوت الصمت الانتخابي واقول في عقل بالي: " يا سلاااام آدي الالتزام وإلا فلا"!!! لكن لو دققت في الصورة كدة وفكيت الخط وقريت الشعارات والتحيات بالبنط العريض فوق وتحت وداير ما يدور يافتة "الصمت الانتخابي": استعجب واضرب كف بكف: منين صمت انتخابي والقصد منه إن الدعاية تنزل في بركة هس وينكفي عليها ماجور لا نلمح لها طيف ولا يبان لها اثر.. ومنين الدعاية ماشالله على عينك يا تاجر واللي ما يشتري يتفرج؟!!! لأ والأكادة إن الدعاية النوبة ديه، على حس الصمت الانتخابي بذات نفسه وانشالله ما حد حوش!!! وعجبي!!!
