Ex PM Manmohan Singh Passes Away : ఆర్థిక సంస్కర్త మన్మోహన్ సింగ్‌ని రాష్ట్రంలోనూ ప్రముఖులు స్మరించుకున్నారు. ముఖ్యమంత్రిసహా మంత్రులు సంతాపం వ్యక్తం చేశారు. బెళగావి నుంచి నేరుగా దిల్లీ వెళ్లిన ముఖ్యమంత్రి, ఇతర అమాత్యులు మన్మోహన్ భౌతికకాయానికి నివాళులర్పించారు. వారంపాటు సంతాప దినాలతోపాటు జనవరి 3 వరకు రాజకీయ కార్యక్రమాలు రద్దు చేసినట్లు పీసీసీ ప్రకటించింది. దేశం మహోన్నత వ్యక్తిని కోల్పొయిందని మాజీ ముఖ్యమంత్రి కేసీఆర్ కొనియాడారు.
మాజీ ప్రధాని మన్మోహన్ సింగ్ పార్థీవదేహానికి ముఖ్యమంత్రి నివాళి అర్పించారు. సీడబ్ల్యూసీ సమావేశాల కోసం బెళగావి వెళ్లిన సీఎం, మాజీ ప్రధాని మరణవార్త తెలియగానే అక్కడి నుంచి నేరుగా దిల్లీ వెళ్లి శ్రద్ధాంజలి ఘటించారు. దేశం కోసం నిష్కళంకమైన, సమగ్రమైన నిర్ణయాలు తీసుకున్నారని సీఎం రేవంత్ రెడ్డి గుర్తు చేసుకున్నారు. రాజకీయ, ప్రజా జీవితంలో మన్మోహన్ సింగ్ లెజెండ్గా ఉన్నారని సీఎం కీర్తించారు. దేశాన్ని ఉన్నతస్థాయికి తీసుకెళ్లడంలో ఆయన పాత్ర అనన్యంగా కీర్తించారు. మన్మోహన్ సింగ్ మృతిపట్ల ఉపముఖ్యమంత్రి భట్టి విక్రమార్క సంతాపం తెలిపారు. ముఖ్యమంత్రి వెంట కాంగ్రెస్ పార్టీ రాష్ట్ర ఇన్ఛార్జి దీపాదాస్ మున్షీ సహా రాష్ట్రానికి చెందిన పలువురు ఎంపీలు ఉన్నారు. శనివారం నాటి అంత్యక్రియల్లో కొందరు నేతలు పాల్గొననున్నారు.
