చిత్తూరు జిల్లాలో దారుణం జరిగింది. పెళ్లయిన విషయాన్ని దాచిపెట్టి ఓ పోలీసు కానిస్టేబుల్ ఇద్దరితో ప్రేమ వ్యవహారం నడిపాడు. ఈ విషయం తెలియడంతో యువతి అతడ్ని నిలదీసింది.. తిరిగి ఆమె తండ్రిపైనే దాడి చేయడంతో మనస్తాపంతో ప్రాణాలు తీసుకుంది. ప్రాథమిక సమాచారం ప్రకారం.. శ్రీకాళహస్తిలోని దక్షిణ క్రైలాస్‌నగర్‌లో నివాసం ఉండే యువతి తొమ్మిదో వార్డు వాలంటీరుగా పనిచేస్తోంది.
తొట్టంబేడు మండలం చేమూరుకు చెందిన కానిస్టేబుల్ ప్రసాద్ శ్రీకాళహస్తీశ్వర ఆలయం దగ్గర విధులు నిర్వహిస్తున్నాడు. ఆయనకు గతంలోనే వివాహమై ఇద్దరు పిల్లలు ఉన్నారు. అతడికి వాలంటీర్‌తో పరిచయం ఏర్పడింది. ఆ తర్వాత ప్రేమిస్తున్నానని చెప్పాడు. ఆ తర్వాత మరో యువతిని కూడా ప్రేమిస్తున్నట్లు యువతికి తెలిసింది. అలాగే అతడికి గతంలోనే వివాహమైనట్లు తెలిసింది.
ఆ బాధను తట్టుకోలేకపోయిన యువతి తల్లిదండ్రులతో కలిసి శ్రీకాళహస్తి భరద్వాజతీర్ధం దగ్గరకు వెళ్లారు. అక్కడ కానిస్టేబుల్‌ను పట్టుకుని నిలదీశారు. ఇద్దరి మధ్య వాగ్వాదం జరగ్గా.. ప్రసాద్ బాధితురాలి తండ్రిపై చేయిచేసుకున్నాడు. ఈ అవమానాన్ని తట్టుకోలేకపోయిన వాలంటీర్ ఇంట్లో ఉరి వేసుకుంది. కుటుంబ సభ్యులు గమనించి కిందకు దించారు. అప్పటికే ఆమె ప్రాణాలు కోల్పోయింది. ఈ ఘటనపై ఫిర్యాదు రావడంతో.. కానిస్టేబుల్ ప్రసాద్‌తో పాటు మరో నలుగురిపై కేసు నమోదు చేశారు.. పరారీలో ఉన్న అతడి కోసం గాలిస్తున్నారు.
