Deputetja e Kuvendit të Shqipërisë Rudina Hajdari me anë të një konference për mediat ka kërkuar që qeveria e Ramës të tërheqë paketën 'anti-shpifje' që pritet të kalojë të enjten për miratim në Kuvend.
Sipas deputetes Hajdari, me anë të ligjit të ri i jepen më shumë kompetenca AMA-s dhe AKEP, gjë që bën që mediat të bien në censurë dhe autocensurë. Ndërkohë Rudina Hajdari ka folur edhe për gjobat që parashikohen nga ky ligj i ri, ku sipas saj masat administrative janë shumë të larta dhe nuk përballohen dot nga redaktorët dhe gazetarët.
Ndër të tjera Rudina Hajdari ka deklaruar se kjo paket ligjore po krijon struktura paralele si ajo me 'KÇK'. Ajo i ka bërë thirrje kryeministrit Rama që të mos bëhet pengesë për Reformën në Drejtësi por të anulojë projektligjin para se të miratohet në Kuvend.
