Pas zhvendosjes së procesit mësimor në ambientet e gjimnazit 'Petro Nini Luarasi', studentët e drejtësisë kanë hasur vështirësitë e para. Ata po zhvillojnë mësim në kushte tejet të vështira, pasi ambientet e gjimnazit nuk kanë kapacitet për akomodimin e tyre. Orët e leksioneve zhvillohen me 4 grupe, por vetëm një pjesë e tyre mund të qëndrojnë brenda.
Nga ana tjetër, në Fakultetin e Histori-Filologjisë, nuk zhvillohet mësim. Studentët janë të vendosur të qëndrojnë në bojkot deri në orën 16.00 të ditës së nesërme, kohë kur skadon afati që i është vendosur Ministrisë së Arsimit në lidhje me plotësimin e 8 kërkesave, ndër të cilat edhe shfuqizimi i ligjit të arsimit. Pjesa më e madhe e fakulteteve, kanë nisur normalisht mësimin. Edhe universiteti i Shkodrës ka lajmëruar se në datën 4 shkurt do të nisë i plotë procesi mësimor.
