Menjëherë pas mbarimit të festës së Kurban Bajramit, qindra shqiptarë të Kosovës janë dyndur drejt bregdetit shqiptar, ku këtë të mërkurë është bllokuar edhe segmentin Morinë-Kukës, pjesë e rrugës së Kombit.
Radha e madhe e automjeteve solli trafik nga zona e njohur si Bardhoc deri në urën e Drinit të Zi, në dalje të qytetit të Kukësit. Drejtuesit e automjeteve thonë, se kanë pritur më shumë se dy orë për të kaluar, pasi radha e automjeteve është shumë e madhe.
Në këtë situatë, Policia Rrugore ka monitoruar gjatë gjithë kohës trafikun, por ai sa vjen e rëndohet, për shkak të ardhjes së mijëra pushuesve nga qytete të ndryshme të Kosovës.
