Një ditë pas ngjarjes së ndodhur në zonën e Radhimës ku efektivë të policisë rrethuan zonën për arrestimin e Gaqo Gjinit, sërish sot oficerë të policisë kanë shkuar për rikëqyrjen e vendit të ngjarjes. Sipas burimeve nga dhe grupi hetimor në vendngjarje janë gjetur mbi 20 gëzhoja të cilat mendohet se i përkasin kalibrave të ndryshme. Sipas burimeve nga grupi hetimor gëzhojat e gjetura do të kalojnë laboratorin e balistikës për të dalë në përfundimin se sa armë kanë qëlluar në drejtim të banesës.
Sipas komunikimit zyrtar, policia e Vlorës bën me dije se 38 vjeçari ka qenë i armatosur me mjet prerës thikë. Në momentin e arrestimit bën me dije zyrtarisht policia e Vlorës Gaqo Gjini ka tentuar të godasë një efektiv dhe ky i fundit e ka plagosur atë në këmbë. Ndërkohë nga familja hidhet poshtë pretendimi i policisë të cilët sot jashtë kamerave kanë treguar se policia beri terror.
Sipas familjarëve 38 vjecari ka qenë në banesë dhe forca të shumta policie kane qëlluar me armë pa fund rreth banesës çka kanë terrorizuar familjarët të cilët ndodheshin aty. Kamera e Report Tv ka fokusuar sot pamjet nga afër ku ndodhi ngjarja. Rreth 20 gëzhoja kane qenë mbi tarracë e banesës, ndërkohë që një gëzhojë është gjetur në afërsi të portës ku mendohet se i përkiste oficerit të policisë që qëlloi në këmbë 38 vjeçarin. Policia po punon per zbardhjen e plotë të ngjarjes.
