ജനകോടികളുടെ വിശ്വസ്തസ്ഥാപനത്തിന് മോചനം!
സാമൂഹിക മാധ്യമങ്ങളിൽ താരം അറ്റ്‌ലസ് രാമചന്ദ്രൻ
ദുബായിൽ ജയിൽമോചിതനായ അറ്റ്‌ലസ് രാമചന്ദ്രനാണ് രണ്ടു ദിവസമായി സാമൂഹിക മാധ്യമങ്ങളിലെ താരം.ചെക്ക് കേസിൽ കുടുങ്ങി മൂന്നുവർഷമായി ജയിലിലായിരുന്ന അദ്ദേഹം മോചിതനായതിൽ സന്തോഷം രേഖപ്പെടുത്തുന്നതാണ് എല്ലാ പോസ്റ്റുകളും.ഒരു വ്യവസായി എന്ന നിലയ്ക്കപ്പുറമുള്ള സ്നേഹമാണ് എല്ലാവരും അറ്റ്‌ലസ് രാമചന്ദ്രനായി കരുതിവെച്ചത്. ഫിനിക്‌സ് പക്ഷിയെപ്പോലെ തിരിച്ചെത്തുമെന്ന അദ്ദേഹത്തിന്റെ ആത്മവിശ്വാസത്തെ തികഞ്ഞ സന്തോഷത്തോടെയാണ് ഏവരും എതിരേറ്റത്.ഇനി കച്ചവടം തുടങ്ങിയാൽ പൂർവസ്ഥിതിയിലാവുന്നതുവരെ അദ്ദേഹത്തിന്റെ സ്ഥാപനങ്ങളിൽനിന്നു മാത്രമേ സ്വർണം വാങ്ങുകയുള്ളൂ എന്ന് ഉറപ്പ് നൽകുന്നവരും ധാരാളം.സാധാരണഗതിയിൽ ഒരാൾ ചെക്ക് കേസിൽ ശിക്ഷിക്കപ്പെട്ടാൽ പലതരത്തിലുള്ള അഭിപ്രായപ്രകടനങ്ങൾ ഉയരാറുണ്ട്. എന്നാൽ, അറ്റ്‌ലസ് രാമചന്ദ്രന്റെ കാര്യത്തിൽ അദ്ദേഹത്തിന് എതിരായ അഭിപ്രായങ്ങൾ കാര്യമായൊന്നും ഇതുവരെ ഉണ്ടായിട്ടില്ല എന്നതാണ് സവിശേഷത. പല കുറിപ്പുകളും അനുകമ്പയുടെയും സ്നേഹത്തിന്റെയും പ്രകടനങ്ങളായിരുന്നു. അദ്ദേഹത്തിനുവേണ്ടി പ്രവർത്തിച്ച ഭാര്യ ഇന്ദിരയും പലരുടെയും കുറിപ്പുകളിൽ ഇടംനേടി.ജയിൽ മോചിതനായെങ്കിലും ഇപ്പോഴും അടുത്ത സുഹൃത്തുക്കളെപ്പോലും കാണാതെ കഴിയുകയാണ് രാമചന്ദ്രനും ഭാര്യയും. ടെലിഫോണിലും ഇരുവരും സംസാരിക്കാൻ തയ്യാറാവുന്നില്ല. അല്പം കഴിയട്ടെ എന്ന മറുപടിയാണ് അവർ എല്ലാവർക്കും നൽകുന്നത്. അവരുടെ സ്വകാര്യത മാനിക്കണമെന്ന് നേരത്തേ തന്നെ അടുത്ത കേന്ദ്രങ്ങളും അറിയിച്ചിരുന്നു.
