Gjurmimi i telefonave të të afërmve të Arbër Çekajt, identifikoi vendodhjen e të kërkuarit dhe çoi policinë gjermane në vendin ku strehohej 42-vjeçari me origjinë nga Tropoja.
Burime të Njësisë së Task- Forcës në Policinë e Shtetit thanë se Çekaj fliste shpesh me bashkëshorten e tij gjermane, duke përdorur numra të ndryshëm telefoni.
Celulari i saj është mbajtur vazhdimisht nën përgjim dhe prej thirrjeve që ajo merrte nga Çekaj janë zbuluar të gjitha lëvizjet e tij, derisa ai u kap në Duseldorf.
Çekaj kishte lëvizur gjatë kësaj kohe edhe në Holandë.
Pasi u mor informacioni i besueshëm dhe u konfirmua, gjermanët komunikuan me homologët e tyre shqiptarë.
Burime thanë se në gjurmët e pronarit te ?Arbi Garden?, të shpallur në kërkim për 613 kilogramët e kokainës të kapur në Durres, u ra 20 ditë më parë.
Në Gjermani dhe Holandë, Çekaj besohet se kishte qëndruar duke përdorur emrin e bashkëshortes së tij Arbër Jansen, por edhe me emrin Fasli Çekaj.
Për të ndihmuar hetuesit gjermanë në arrestimin e 42 vjeçarit, në Gjermani pak javë më parë kishin mbërritur edhe disa hetues të zyrës së Task- Forcës. Tashmë pritet që pas një procesi të shpejtë gjyqësor Çekaj të ekstradohet në Shqipëri.
Çështja po shqyrtohet nga Krimet e Rënda, pasi besohet se pas Çekajt fshihen edhe persona të tjerë.
Tv Klan
