Pas kthimit nga Brukseli, Kryetari i Grupit Parlamentar të Partisë Socialiste, Taulant Balla në një deklaratë për mediat në ambientet e Kryesisë së Kuvendit i ka bërë sërish thirrje Lulzim Bashës që të sqarojë publikun për akuzat e financimit rus të partisë që ai drejton në SHBA.
Sipas Ballës, KQZ-ja dështoi në skanimin e këtij skandali të rëndë dhe tani i përket Prokurorisë që të merret me këtë çështje, duke marrë në pyetje Lulzim Bashën, si personin përgjegjës për këtë skandal.
Deklarata e plotë e Kryetarit të Grupit Parlamentar të PS-së, Taulant Balla:
Duhet të kuptojmë që institucionet e pavarura që zgjidhen nga Kuvendi çdo vit raportojnë në Kuvend dhe më pas është Kuvendi që përmes rezolutës miraton gjetjet dhe rekomandimet për funksionimin e institucionit vitin pas ardhës. Rasti i radhës është KQZ-së, i cili ka raportuar mbi veprimtarinë e tij gjatë viti 2017 dhe jemi në fazën që do të bëjmë rekomandimet për përmirësime të funksionimit të këtij institucioni gjatë vitit 2018.
Duhet të jem i qartë që edhe nga të dhënat që kemi marë zyrtarisht nga KQZ-ja. Ne i kemi kërkuar dhe na është vënë në dispozicion i gjithë informacioni i depozituar nga PD-ja, lidhur me shpenzimet e PD-së gjatë fushatës së vitit 2017.
