Dardan Gjeka, 24-vjeçari nga Shkodra i cili rezultoi pronar i automjetit Benz S-Class i cili shkaktoi aksidentin tragjik në Maminas, pretendon se nuk është në kërkim nga policia. Në një lidhje telefonike në redaksinë e Report Tv, Gjeka thotë se automjetin e ka shitur te Fatjon Zhaborja rreth një muaj e gjysmë më parë. "Nuk jam në kërkim. Kam shkuar në tetë të mëngjesit në policinë e Durrësit dhe kam dhënë shpjegimet, kam çuar aktin e shitjes së makinës. Automjetin e nxora në internet në shitje dhe më mori në telefon burri i huaj para një muaji e gjysmë. Ia kam shitur, kam bërë aktin e shitjes dhe ai iku në punë të vet. Nuk kam njohje me viktimën dhe as me personin që ka shkaktuar aksidentin", ka thënë ai pas një telefonate në redaksinë e Report Tv.
