„Меѓаши“: Злоупотреба на деца за политичка промоција
Jan 9, 2018 452 0
АКЦИЈА Facebook Twitter
За превоз на деца за време на манифестацијата „Бадникови поворки“ здружението изнајмило 18 автобуси од ЈСП. Децата биле превзени од скопските општини до црквата „Рождество на Пресвета Богородица“, од каде потоа маршираа до Соборниот храм во центарот на Скопје.
Здружението „Бадникови поворки“ за превозот треба да плати 52.000 денари, информираат од јавното претпријатие.
Од друга страна, Министерството за образование и наука утре ќе побара од Државниот просветен инспекторат да ги испита сите индиции за евентуално верско организирање и дејствување во училиштата.
Од МОН дополнуваат дека инспекциски надзор беше невозможен во изминативе неколку денови, со оглед на тоа што покрај учениците кои се на зимски распуст и вработените во училиштата не беа на работа.
„Министерството за образование и наука не побарало, ниту Министерството дало согласност за преземање на било какви активности во училиштата за подготовка или организирање на учениците за учество во овие манифестации, во текот на првото полугодие од оваа учебна година“, велат од МОН.
Драги Змијанац од детската амбасада „Меѓаши“ вели дека сите градоначалници, оркестрирано и организирано со логистичка поддршка од градинките и училиштата направиле злоупотреба на децата.
„Некоректен однос и злоупотреба за политички цели. Јас им препорачувам ако толку сакаат да им одат децата, да обезбедат автобуси и организирано 7 илјади 350 деца со гас маски да им појдеме кај сите градски татковци, каде што мерните станици веќе алармираат подолго време дека е вонредна состојбата за да преземат конкретни чекори да се регулира аеро-загадувањето“, додава Змијанац.
Таткото на градот Петре Шилегов тврди дека Градот даде на располагање автобуси од ЈСП на организацијата на Бадникови поворки, но како што вели си ништо не бил нарушен уставниот принцип на секуларноста.
Во манифестацијата „Бадникови поворки“ беа вклучени над седум илјади деца од повеќе градови во Македонија. Децата најпрвин одеа кај градоначалниците на општините, каде ја пееја божикната песна „Вечниот бог“, а градоначалниците ги даруваа со пакетчиња и подароци.
Организатор беше здружението „Бадникови поворки“, кое е формирано во февруари минатата година, а доби логистика од повеќе општини во земјава, Градот Скопје и МПЦ.
Арбана Ќерими
