Kryetari i Partisë Demokratike tha sot gjatë fjalimit në çadrën e protestës së opozitës se në grykëderdhjen e Ishmit ka ngecur një skaf.
Sipas kryetarit të PD, mjeti lundrues është i Habilajve, ndërsa akuzoi policinë dhe mediat se nuk guxojnë t'i afrohen.
"Kush nuk sheh drogën dhe krimin ose është i papërgjegjshëm, ose i zhages, vjen me paratë e drogës, paratë e korrupsionit, drogës që vazhdon të vërshojë me tonelata drejt Europës dhe ku këta bëjnë vetë shfaqje.
Në grykëderdhjen e Ishmit ka tre ditë që ka ngecur në llucë skafi i Habilajve me tre motorë të fuqishëm. E di policia, e di ministri i Brendshëm, e di kryeministri, por nuk guxojnë ta prekin me dorë sepse Habilajt janë pronarët e vërtetë të kësaj qeverie. As mediat nuk flasin për këtë. E di i gjithë Ishmi. Nuk guxojnë të çojnë kameran, të bëjnë një filmim qoftë edhe fshehurazi e të thonë ç'bën ky skaf tre ditë më llucën e Ishmit? Kush e ka? E ka shteti i Edi Ramës, shteti i inkriminuar dhe i droguar i Edi Ramës", u shpreh Basha.
