Shefja e BE për politikën e Jashtme, Federica Mogherini, ka nisur vizitën zyrtare në vendin tonë.
Mogherini mbërriti në aeroportin e Rinasit rreth orës 16:00, ndërsa takimin e parë në Tiranë e zhvilloi me Presidentin Bujar Nishani.
Zyrtarja e BE do ketë takime dhe me kryeministrin Edi Rama, kryetarin e Kuvendit, Ilir Meta si dhe kreun e opozitës, Lulzim Basha.
Burime për Report Tv mësojnë se në takimin e kërkuar nga BE, do të jetë Basha, dhe dy nënkryetarët e PD-së Edmond Spaho dhe Edi Paloka.
Kujtojmë që ditën e djeshme fillimisht u tha se përfaqësuesja e lartë e BE-së nuk do të takohej me kreun e opozitës.
Më pas edhe Basha konfirmoi se s'do ketë takim me Mogherinin, por në vend të tij do të jenë përfaqësues të PD-së, sipas formatit të kërkuar nga zyrtarja e BE-së.
Mogherini rikthehet në Shqipëri ekzaktësisht pas një viti. Në 3-4 mars të një viti më parë ajo ishte në Tiranë ku i bëri thirrje opozitës dhe maxhorancës të gjejnë konsensusin për Reformën në Drejtësi.
