13 Dhjetor 1981 Kryeministri Mehmet Shehu vdes. Shkaku, ai zyrtar është vetëvrasja. Sot, pas 36 vitesh, askush nuk mund të thotë me vërtetësi se çfarë ndodhi atë natë në dhomën e Mehmet Shehut, u vetëvra apo e vranë.
Këtë histori, për të cilën shkrimtari Ismail Kadare shkroi librin ?Pasardhësi?, dy maqedonasit, dramaturgu Goran Stefanovski që e përshtati për skenë dhe regjisori Slobodan Unkovski, e sollën më në fund edhe në Tiranë.
Ideja e parë e regjisorit të më shumë se 100 shfaqjeve në Ballkan, ishte që ?Pasardhësi-n? ta vinte në Teatrin Kombëtar. Pasi nuk morri asnjë përgjigje, projektin e zhvendosi në Kosovë, ku e realizoi me trupën kombëtare atje.
Slobodan Unkovski, regjisor maqedonas: Nuk e di pse nuk më kthyen përgjigje, ndoshta kjo periudhë është e rrezikshme dhe nuk është e lehtë për të qenë të hapur ndaj saj. Më pëlqejnë historitë ku është e përfshirë politika, diktatorët dhe fati i njerëzve të thjeshtë. Teatri Kombëtar duhet të ketë një qasje të re, të jetë më i hapur ndaj këtyre veprave. Ky është opinioni im.
Dhe në Tiranë, ku ndjeshmëria e publikut është më e madhe, ironia është se u vu vetëm për një natë në skenë, të martën në mbrëmje dhe falas.
?Pasardhësi? i morri katër vite pune regjisorit, me një koncept ku mbizotëronte narrativa dhe mungonte konflikti çka e bënte shikuesin të humbiste vëmendjen. Duket se edhe për vetë regjisorin ?Pasardhësi? ishte një proces shumë kompleks, edhe për të dhënën se përkthimi veprës nga anglishtja në shqipen e Kosovës, humbi forcën e fjalës.
Slobodan Unkovski, regjisor maqedonas: Kadare është një shkrimtar i shkëlqyer. Është shumë i thellë, madje edhe kur e lexon ti duhet të ndalosh dhe të mendosh. Kemi humbur disa gjëra nga vepra e tij, për shkak të përkthimit nga anglishtja në shqip . Teatri është i shpejtë. Jemi përpjekur që ta bëjmë sa më të kuptueshme. / TV KLAN
