Provimi i gjuhës angleze për provimet e maturës nuk do të zhvillohet në të njëjtën ditë me provimet e tjera, ndërkohë që do të ruhet edhe për këtë vit forma 3 provime të detyrueshme dhe 2 me zgjedhje. Kjo u konfirmua nga zëvendësministrja e Arsimit dhe Sportit, Nora Malaj, pas takimit me rektorët e universiteteve në vend.
Gjithashtu për provimet e vitit 2017 do të bëhet edhe njësimi i terminologjisë, ku maturantët të mos penalizohen për shkak të kësaj të fundit.
Ndërkohë, maturantët për çdo pyetje që do të kenë dhe që nuk kanë mundur të marrin përgjigjet në drejtorinë rajonale ku përkasin apo në universitetet ku do të aplikojnë, kanë të drejtën të pyesin drejtpërsëdrejti në Ministrinë e arsimit dhe sportit, nëpërmjet një linku me pyetje/ përgjigje që do të vihet në dispozicion të tyre.
