Në një kohë kur tryeza politike diskuton konsensusin për draftin e Reformës në Drejtësi janë gjyqtarët e Krimeve të Rënda dhe Apelit që kundërshtojnë shkrirjen e Gjykatës së Krimeve e cila preket me hyrjen në fuqi të reformës.
Kundërshtimet u shprehen në analizën vjetore të Krimeve të Rënda dhe Apelit nga dy krerët e këtyre gjykatave Sandër Simoni dhe Femi Petku.
I pranishëm në këtë analizë Ministri i Drejtësisë Ylli Manjani u shpreh se Krimet e Rënda janë një histori suksesi në këto 12 vite dhe duhet që të jenë shembull për të gjithë sistemin e drejtësisë.
Në analizën vjetore të Krimeve të Rënda nuk kanë munguar dhe shqetësimet për zvarritjen e proceseve gjyqësore ku sipas Simonit shkak përgjatë 2015 është bërë mos paraqitja e prokurorëve.
Ndërsa për Kreun e Apelit të Krimeve të Rënda shqetësim mbetet siguria fizike e gjyqtarëve gjatë kohës që ata transferohen në rrethe dhe lëvizin në kushte të papërshtatshme përfshi dhe automjete që prishen rrugës.
Përgjatë vitit 2015 në Gjyaktën e Krimeve të rënda janë gjykuar 311 persona ku 233 të gjykuar janë meshkuj dhe 18 gra.
Po ashtu në 2015 nga kjo gjykatë janë vendosur 21 masa sekuestro për pasuritë e përfituara nga aktivitetet e jashtëligjshme të grupeve kriminale si dhe 14 konfiskime pasurish për llogari të shtetit.