Një argjendari në rrugën ?Luigj Gurakuqi? pranë ish- Pazarit të ri në Tiranë, u bastis mëngjesin e të shtunës, nga një grup personash të paidentifikuar.
Pronari i argjendarisë, ?Esenca?, Pavlo Shkarpa tha për Report Tv, se autorët kanë bastisur rreth 8 kilogramë ar, 25 kg argjend dhe 250 ora.
Në total vlera e tyre shkonte në rreth 500 mijë euro, ndërsa sipas Shkarpës, malli i vjedhur është mundi i punës së 25 viteve.
Autorët e vjedhjes kanë hapur një tunel në një godinë e cila ishte në rikonstruksion e sipër dhe kishte murin e përbashkët me argjendarinë.
Më pas ata kanë hipur në tavanin e objektit duke e shqyer atë për faktin se ishte i përbërë me material të dobët. Po ashtu autorët kanë mundur të çaktivizojnë sistemin e alarmit dhe të kamerave të sigurisë duke bërë që më pas të hapnin kasafortën dhe të merrnin të gjithë vlerën e bizhuterive dhe të orave të shtrenjta që ndodheshin aty.
Shërbimi privat i sigurisë ka mbërritur në vendin e ngjarjes, por pa mundur të kuptojë se kishte të bënte me një grabitje, ndonëse sinjali i alarmit, kishte rënë në sallën operative të kompanisë.
