Владата и Собранието, кои го имаат мнозинството, можат повторно да го изменат Законот за помилување, чии одредби беа укинати од Уставниот суд, само треба да го посакаат тоа, изјави синоќа во Топ тема на Телма, претседателот на Македонскиот центар за европско образование.
Истото, вели тој, можат да го сторат и со евентуалната аболиција на обвинет за изборен криминал од страна на Иванов.
Со реакција по вчерашната одлука на судот, денеска се јави и поранешниот претседател на Уставниот суд, Бранко Наумовски, кој вели дека е горд сум што не е судија во овој состав на судот.
Наумовски вели дека, укинувањето на одредбите итно му требаше на Груевски, за евентуално негово аболирање. Смета и дека, по изборите, ако ги добие повторно истата партија, ќе следи и иницијатива за укинување на Специјалното јавно обвинителство за да можат да бидат спасени сите кои би биле обвинети или осудени за изборни манипулации.
Од Транспарентност Интернешенел, пак, му испратиле писмо на Иванов,кого го потсетуваат дека, со потпишувањето на бројни меѓународни документи, државата се обврзала да ги гони сторителите на изборен криминал, а не да ги помилува.
И Либерал демократите го повикаа Иванов да се изјасни дали ќе биде директниот и последен соучесник во уривањето на уставниот поредок?
Доколку не се изјасни јавно за намерите, ЛДП најавија дека ќе поведат постапка за одземање на неговиот мандат.
Од ДОМ пак, прашуваат, зошто одлуката е донесена сега, кога се води постапка за изборен криминал против некои членови на владејачките партии?
Осуда, огорченост и револтираност од одлуката стигна и од Првата детска амбасада во светот Меѓаши. Претседателот на државата доби можност да помилува и педофили.
„ Срамна и скандалозна е оваа постапка и воопшто не помага во превенција и заштита на децата од сексуална злоупотреба за која со години се залагаме и за која постигнавме одреден напредок но сега се паѓа во вода. Оваа одлука крајно го деградира угледот на судиите и претседателот! Недозволиво е педофили да можат да бидат помилувани и секоја идна одлука од страна на претседателот оди директно на неговата чест и совест. Ако се има предвид дека педофилите во најголем број случаи го повторуваат делото, доколку во иднина се појават повторно случаи на педофилија тогаш Првата детска амабасада во светот МЕЃАШИ ќе ги смета Претседателот на државата и Уставниот суд за соучесници.“, изјави за Фактор директорот на Меѓаши Драги Змијанац.
Од Кабинетот на Иванов вчера преку соопштение најавија дека претседателот во извршувањето на оваа негова ингеренција ќе се води исклучиво според одредбите од Законот за помилување.
Далиборка Демјанска-Цветановска
