Qeveria pritet të ndryshojë brenda 6-mujorit të parë të këtij vitit pagën minmale në shkallë vendi. Janë dy opsione për rritjen e pagës minimale. Burime të Report TV nga Ministria e Mirëqenies Sociale bëjnë me dije se do të propozohet që paga minimale në vend të rritet më 1 mijë lekë të reja brenda 6-mujorit të parë të 2016-s.
Mundësia tjetër është edhe që ndryshimi të bëhet aq sa është sot niveli i rritjes ekonomike rreth 2%, pra paga minimale të rritet me 500 lekë.
Por ndryshimi i pagës minimale kundërshtohet fort nga përfaqësueist e biznesit. Në mbledhjen e fundit të Këshillit të Punës bizneset janë shprehur se rritja e pagës, mund të krijojë kushtet për një informalitet më të lartë në tregun e punës. Prej 3 vitesh niveli i pagës minimale për efekt të llogaritjes së kontributeve shoqërore e shëndetësore nuk është ndryshuar.
Sot Shqipëria ka një ndër pagat minimale më të ultat në rajon prej 22 mijë lekë, e dyta pas Maqedonisë. Kështu Maqedonia ka pagë minimale 131 euro, Kosova 170 euro, Bullgaria 184 euro dhe Greqia 586 euro.
Tabela
Paga minimale në rajon
Maqedonia 131 Euro
Shqipëria 156 Euro
Kosova 170 Euro
Bullgari 184 Euro
Mali i zi 193 Euro
Greqia 586 Euro
Paga më e lartë minimale në Europë është në Luksemburg prej 1923 euro.
