TIRANË - Një mbledhje e pazakontë e grupit parlamentar të Partisë Demokratike dje në orët e para të mëngjesit, e kërkuar nga ish lideri Sali Berisha, konkludoi me një vendim unanim të demokratëve, kundër projektligjit të Byrosë. Kësisoj, prej ditës së djeshme, PD ka një qëndrim zyrtar: ajo nuk do ta votojë atë. Ndryshe nga sa u shpreh në mbledhjen e grupit parlamentar të mërkurën, disa orë më vonë, mëngjesin e të enjtes, kryetari demokrat, Lulzim Basha, tha se drafti i qeverisë nuk është ai për të cilin është dakordësuar opozita. Kryetari Basha është pajtuar plotësisht me qëndrimin e Berishës, pavarësisht se në pak orë, deklaratat e tij kanë qenë në kontradiksion të plotë. Gjithashtu, mësohet se Berisha ka informuar kryetarin Basha mbi mundësinë e rrjedhjes së votave, për Byronë Kombëtare të Hetimit.
