ELBASAN - Një masakër me tre të vrarë e 8 të plagosur tronditi mbrëmë mbarë opinionin publik. Vrasjet e ndodhura për shkak të konflikteve të nisura 10 vjet më parë i morën jetën një anëtari të fisit Capja , i cili ka një histori hasmërie me fisin Mema në Elbasan, ndërsa mbetën të vdekur edhe dy persona të tjerë që ndodheshin me të. Autorët ende të paidentifikuar, qëlluan me 65 plumba nga tre kallashnikov në drejtim të lokalit në pronësi të Agron Çapjas, dhe u larguan me makinë.
...
Një sulm i armatosur në një lokal pranë stadiumit "Elbasan Arena" i mori jetën tre personave, ndërsa 8 të tjerë mbetën të plagosur, tre prej të cilëve në rrezik për jetën në spitalin e Traumës. Atentati i cili deri më tani dyshohet se ka motiv hasmërinë për krime të viteve më parë, që prej '97-ës, ndodhi rreth orës 19:54 të mbrëmjes të së mërkurës (3 janar) në lokalin e kompleksit "Univers" në Elbasan në pronësi të familjes Çapja. Mendohet se shënjestër e atentatorëve ishin pikërisht anëtarët e fisit Çapja, njëri prej të cilëve mbeti i vdekur në vend. Agron Çapja, Ardit Sinakoli dhe Eno Bedalli mbetën viktima të breshërive të armëve automatike u lëshuan drejt derës kryesore të lokalit dhe dritareve, nga autorë ende të paidentifikuar. Të plagosurit, disa prej të cilëve kanë lidhje fisnore mes tyre, janë Ardian Zharri, Fejzulla Çapja, Ferit Muça, Luan Muça, Bujar Reshka, Florenc Çapja, Arnold Çapja dhe Erdis Sulku.
Tre mendohet të kenë qenë autorët e atentatit të cilët dyshohet se ishin të kamufluar me rroba ushtarake apo uniforma policie. Sipas burimeve të policisë autorët i kishin ndjekur prej dy ditësh viktimat e tyre. Pasi kanë lëshuar breshërinë e plumbave drejt lokalit, autorët janë larguar menjëherë me nje makinë gri, ndërsa policia ka ngritur postblloqe në rrugët hyrëse dhe dalëse të qytetit për të mundësuar kapjen e tyre. Viktimat
Agron Çapja, 50 vjeç, banues në Elbasan
Ardit Sinakoli , 27 vjeç, banues në Elbasan
Eno Bedalli, 38 vjeç, banues në Elbasan
Gjithashtu kanë mbetur të plagosur dhe ndodhen në gjendje të rëndë:
Ardian Zharri, 45 vjeç banues në Elbasan
Fejzulla Çapja, 58 vjeç, banues në Elbasan
Ferit Muca, 42 vjeç banues në Elbasan
Luan Muca, 47 vjeç ,banues në Elbasan
Bujar Rreshka, 40 vjeç banues në Librazhd
Florenc Çapja, 35 vjeç banues në Elbasan
Arnold Çapja, 23 vjeç, banues në Elbasan
Erdis Sulku, 33 vjeç, banues në Elbasan
