TIRANE - Në Shqipëri qytetarët udhëtojnë me autobusë të vjetër mbi 22 vjeçar. Me hyrjen në fuqi të ligjit të ri të transportit ndërqytetas, firmat duhet të ndërrojnë flotat e autobusëve çdo 5 vjet. Këtë ndryshim të rëndësishëm e prezantoi ministri i Transportit dhe Infrastrukturës Edmond Haxhinasto gjatë raportimit në komisionin parlamentar të Integrimit. Reforma në transportin ndërqytetas është ende në fazën e projektligjit i cili ka nisur të diskutohet në komisionet kuvendore për tu miratuar më tej në Parlament.
"Kapaciteti i autobusëve sot është 62%, janë 1058 autobusë në sistem të regjistruar dhe prej tyre punojnë 810. 40 % e tyre janë të një prodhimi mbi 22 vite, vetëm 12 % janë e moshës 15 vjet. Ndërhyrje tjetër do të jetë vetë plani i rinovimit të flotës, duke patur parasysh dhe duke respektuar maksimalisht kapacitetet e operatorëve të ri, tashmë të kërkuar sipas propozimit të ri, dhe mundësinë për rinovimin e flotave, ku është vendosur një kalendar 5 vjeçar", tha Haxhinasto.
