http://www.vizionplus.tv
https://facebook.com/VizionPlusTV
https://twitter.com/VizionPlusTV
Oborri i shkollës së mesme "Olsi Lasko" në Shkozet të Durrësit merr këtë pamje sa herë ka shi të dendur dhe procesi mësimor ndërpritet. Kështu ka ndodhur edhe këtë të martë, kur nxënësit e kanë bërë pushim, pavarësisht se janë bërë përpjekjet për tharjen e pellgut të madh me ujë që ka rrethuar godinën. Për shkak të reshjeve të dendura, në një shkollë tjetër në Shkozet janë shkaktuar ndotje masive nga vajrat dhe nafta që ka hyrë në kanalizimet pranë saj. Drejtori i shkollës së mesme "Beqir Çela" tha se presim nga bashkia të marrë masa për zgjidhjen e kësaj situate, pasi i gjithë oborri është ndotur nga mbetje vajore. Shkak për përmbytjet e vazhdueshme në shkozet u bënë edhe këtë radhë shirat e rrëmbyer që përfshinë këtë zonë në 24 orët e fundit. Autoritetet portuale dhe forca të zjarrfikëseve janë shpërndarë në disa zona për të larguar ujin nga rruga, por sipas banorëve të zonës zgjidhja duhet të jetë e vazhdueshme dhe jo me ndërhyrje të tilla. Problematika e përmbytjeve në Shkozet lidhet edhe me ndërtimet pa leje që kanë bllokuar kolektorët. Ndërkaq hidrovori në "Porto Romano" punon me kapacitet të plote dhe sipas burimeve nga Bordi i Kullimit nuk ka pasur ndërprerje të energjisë elektrike apo defekte, që mund te sjellin probleme.
