http://www.vizionplus.tv
https://facebook.com/VizionPlusTV
https://twitter.com/VizionPlusTV
Parku kombëtar Shebenik-Jabllanicës në rrethin e Librazhdit, me një sipërfaqe, është i rrezikuar nga shkatërrimi që vjen nga ndërtimi i HEC-eve. Këtu janë planifikuar që të ndërtohen 45 hidrocentrale lokale, çka për ambientalistët dhe banorët e zonës është një katastrofë e vërtetë natyrore. Projektet për ndërtimin e këtyre hidrocentraleve kanë kaluar prej disa muajsh në qeveri ndërsa me ndërtimin e tyre parashikohet që uji që përshkon këtë zonë të futet i tëri në tuba ndërsa të ndërtohen njëra pas tjetrës një numër i madh godinash. Kjo do të çonte në prishjen e ekosistemit natyror, ndryshime të mëdha mikroklimatike në zonë, ulje të lagështirës ajrore, zhdukje të florës dhe faunës, ndikime në bimësinë, etj. Për të parandaluar këtë masakër mbi mjedis, grupimi "Ekolëvizja" organizoi një takim me prefektin e Elbasanit, ku parashtroi dëmet që vijnë nga ndërtimi i këtyre HEC-eve si dhe kërkoi mbështetje për të ruajtur Parkun kombëtar të Shebenikut nga shkatërrimi. Xhemal Mato, drejtues i këtij grupimi u shpreh këto hidrocentrale do të ndikonin negativisht edhe në turizmin drejt kësaj zone. Ndërsa prefekti i Elbasanit premtoi bashkëpunim të pushtetit lokal për këtë çështje. Parku i Shebenik-Jabllanicës shtrihet në 6 komuna të rrethit të Librazhdit dhe ka një sipërfaqe prej 33 mijë hektarë.
