21ви Септември- Меѓународен ден на мирот
Ученици/чки и наставници/чки од средните училишта Панче Караѓозов, Никола Карев, и Арсениј Јовков денес, на Меѓународниот ден на мирот симболично се сретнаа и размеија пораки за мир на Камениот мост во Скопје.
Да градеме мостови а не огради! За подобар свет, за сите, секаде.
По повод 21 септември Меѓународниот ден на мирот, училиштата вклучени во проектот Мировно образование на Првата детска амбасада во светот Меѓаши спроведуваат низа различни активности.
Активностите ќе се реализираат во неколку градови во Република Македонија.
Велес – учениците и наставниците од СОУ Гимназијата „Кочо Рацин„ во понеделник 21.09 во 12.30ч. ќе излезат на Мировен марш низ улиците на Велес во непосредна близина на училиштето.
Скопје – во понеделник 21.09., ученици и наставници од училиштата СУГС Гимназија„Никола Карев„, СМУГС„Д-р Панче Караѓозов„ СУГС„Арсени Јовков„ ќе тргнат од своите училишта во правец на Камениот мост каде што во 13ч. ќе се здружат и на симболичен начин ќе упатат пораки за мирот наспроти сите поделби во општеството. Оваа активност е реализирана во соработка со граѓанско здружение за унапредување на културата, мултиетнички развој, образование, екологија и спорт „Нобилис„ основано од неколку професори ентузијасти.
Скопје – Во подрачното училиште СУГС „Владо Тасевски„ каде наставата се одвива на албански наставен јазик, во работната недела 21-25.09 ќе се одржат повеќе разговори со учениците на теми поврзани со емигрантите и хуманитарните активности.
Гостивар – во понеделник 21.09 во СОУ Гимназија „Гостивар„ на првиот час ќе биде прочитан пригоден текст за Меѓународниот ден на мирот а потоа учениците ќе имаат можност да разговараат на тема „Што е за мене мирот денес/како знам дека живеам во мир?„
Дебар/Могорче – ЦСНО „28 Ноември/Здравко Чочковски„ во петок 18.09 во Могорче е одржана хуманитарна акција собирање помош за емигрантите од Сирија, во сабота 19.09 во Могорче е одржана работилница каде што се изработени различни пораки на теми поврзани со емигрантите кои потоа се залепени низ Могорче. Во работната недела 21-25.09 во Дебар ќе се одржат повеќе разговори со учениците на теми поврзани со емигрантите и хуманитарните активности.
