TIRANË - Avioni Ultra Legero Aeroprakt A22 i sekuestruar nga policia italiane me 120 kg marijuanë dhe i pilotuar nga shqiptari Vilson Lamaj tashmë i arrestuar, është një model aeroplani që fluturon pa u pikasur nga radarët.
Në një intervistë për A1 Report inxhinieri elektrik njëherazi pilot i një avioni të ngjashëm Bensik Likollari sqaron se si ky avion fluturon me busull në një lartësi të ulët dhe me pamje vizuale.
Likollari po ashtu sqaron se ky model avioni nuk fluturon natën dhe nuk përdor pista të autorizuara por mund të ulet aty ku kushtet teknike mundësojnë një distancë të sheshtë nga 20-30 metra.
Ndalur tek rasti i përdorimit të këtyre avionëve nga trafikantët, piloti shqiptar shprehet se është policia ajo që duhet të pajiset me teknologji qoftë dhe me avion për të ndaluar transportin e narkotikëve, pasi zgjidhja nuk është ndalimi i përdorimit për turizëm apo pasione sportive.
Se si mund të fluturosh në territorin shqiptar me një avion të tillë, Likollari shpjegon se mjafton të plotësosh dokumentacionin e pronësisë dhe një leje drejtimi.
