DURRES - Pamjet filmike të kamerave të sigurisë dhe përshkrimi i kasieres kanë çuar në pranga autorin e dyshuar të grabitjes me armë të ndodhur mbrëmë në qytetin e Durrësit. Uniformat blu të qytetit bregdetar arrestuan në banesën në lagjen numër 18, 30-vjeçarin Fatmir Lukja, ndërsa iu kap dhe arma me të cilën kreu grabitjen.
Ngjarja ndodhi rreth orës 20:00 të së enjtes, pranë Spitalit të Durrësit, ku 30-vjeçari me një pistoletë sportive dhe i maskuar arriti të vidhte paratë e xhiros ditore të supermarketit (20.000 lekë të reja) të ndodhur në lagjen 18.
Sipas policisë së Durrësit, Fatmir Lukjes iu gjet e sekuestrua edhe një arsenal sendesh të përdorura përgjatë grabitjes të tilla si arma e zjarrit, kapuci, veshjet që mbante gjatë grabitjes, ndërkohë që shumën e vjedhur ky shtetas dyshohet t'a ketë shpenzuar në lojëra fati.
Në kohën kur ka ndodhur grabitja aty ka qenë vetëm kasierja e cila ka dorëzuar menjëherë paratë kur është ndodhur përballë armës.
Ndërkaq, besohet se në këtë ngjarje janë të përfshirë edhe dy persona të tjerë të cilët janë në kërkim.
