TIRANË - Ministria e Financave ka publikuar së fundmi në internet, emrat e kompanive që Qeveria iu ka paguar detyrimet e prapambetura në fushën e investimit dhe të rimbursimit të TVSH-së deri më 24 prill 2014.
Këto emra gjendet në faqen online të Ministrisë së Financave, tek rubrika "Shlyerja e Detyrimeve te Prapambetura".
Nga të dhënat e paraqitura në kolonën "Vlera e shlyer" vërehet se jo të gjitha kompanitë i kanë tërhequr paratë.
Qysh në muajin mars 2014, sapo Qeveria shqiptare miratoi Strategjinë e Shlyerjes së Detyrimeve të Prapambetura ndaj biznesit dhe individëve, Ministria e Financave publikoi listën me subjektet dhe faturat për likuidim.
Deri më tani, në mbyllje të muajit prill, Ministria e Financave ka zhbllokuar rreth 160 milionë dollarë detyrime të prapambetura në sektorët e investimeve publike, rimbursimit të TVSH dhe atij energjetik.
Në lidhje me rimbursimin e TVSH, Ministria ka shpallur listën e subjekteve për detyrime që i takojnë periudhës deri më 31 dhjetor 2013, me vlerë rreth 85 milionë dollarë. Pra, nëse për likuidimin e borxhit ndaj firmave private tek investimet publike Ministria është duke proçesuar për vitet 2010-2011, te rimbursimi i TVSH ka avancuar duke mbyllur kështu 2013-n (pas rakordimin me drejtorinë e Tatimeve në lidhje me detyrimet që ka biznesi).
Nëse llogarisim edhe detyrimet e paguara në dhjetor 2013, në total fatura e borxheve të vjetra të shlyera deri më tani arrin gati në 200 milionë dollarë. Për vitin 2014 është parashikuar në buxhet të shlyhen rreth 350 milionë dollarë fatura të prapambetura.
