Emërimet e reja të qeverisë në dy institucione në Korçë janë denoncuar sot nga PD.
Zëdhënësja Laura Vorpsi tha se në krye te Drejtorisë së Metrologjisë është vendosur ish-kreu i PS në Korcë i dënuar nga Gjykata për pengim të zbatimit të vendimit gjyqësor dhe pjesë e këtij institucioni është dhe kryetarja e FRESH-it, e cila u hetua për blerje të votave për zgjedhjet lokale në Korçë.
Sipas PD-së edhe drejtori i ri i shërbimit pyjor në këtë qytet është një person i akuzuar dhe i dëbuar nga SHBA për dhunë në familje dhe mashtrim
Deklarata e plotë e Laura Vorpsit
Rilindja e Edi Ramës i mori jetën një gruaje në Korçë, duke e çuar në vetëvrasje pas largimit nga puna pa motiv ligjor.
Po ju paraqesim sot tre raste, se si funksionon meritokracia e kësaj qeveria, kodi etik dhe shanset e barabarta pikërisht në Korçë.
Drejtor i Metrologjisë është emëruar Muharrem Meko, ish-kryetar i PS-së në Korcë, i dënuar nga Gjykata për veprën penale të pengimit të vendimit gjyqësor.
Në krye të kualifikimit profesional, është emëruar Anxhela Taho, kryetarja e FRESH-it, e cila është e përfshirë në hetimet e prokurorisë si organizatorja e blerjes së votave për zgjedhjet lokale në Korçë, e kapur në flagrancë me zë e me figurë.
Drejtor i Shërbimit Pyjor në Korçë, është emëruar Arsen Selimi, ndaj të cilit një gjykatë në Amerikë ka vendosur t'i refuzojë qëndrimin atje dhe ta kthejë në Shqipëri me akuzën e dhunës në familje dhe të mashtrimit.
A mund të na thotë z.Rama se cilin nen të kodit të etikës ka zbatuar në këto tre emërime.
Në kodin e etikës, Rama është angazhuar për transparencë dhe përgjegjshmëri ndaj publikut. A mund t'i thotë Kryeministri publikut, se cilin nen të kodit ka respektuar ai, në rastet që ne kemi denoncuar e denoncojmë çdo ditë me emërimet e personave me precedent penalë, në zyrat e punës, në CEZ, në sektorët kyç të Ministrive, në drejtoritë rajonale, nga Korça, Kavaja, Tropoja e kudo në Shqipëri.
