LEZHË- Katet e para të pallateve në qytetin e Lezhës janë kthyer në një vendgrumbullim mbetjesh urbane, shpesh edhe në vende të përshtatshme për përdoruesit e drogës. Kjo situatë ka krijuar një shqetësim serioz tek banorët, të cilët kërkojnë zgjidhje nga pushteti vendor.
Këto ambiente nuk janë godina të braktisura, por katet e para të pallateve në Lezhë. Janë projektuar për ambiente shërbimi, por ne fakt këto ambiente kanë marrë funksion tjetër. Shërbejnë si vende depozitimi për mbetjet, konsiderohen të përshtatshëm për përdoruesit e drogës e shpesh përdoren si banjo publike, ndërsa per banorët e kateve të sipërme ky përbën një shqetësim serioz.
Qytetarët lezhjanë kanë kërkuar ndërhyrjen e bashkisë dhe policisë, por ende asnjë zgjidhje. Ndërsa shqetësimi i banorëve të këtyre pallateve sa vjen dhe rritet, shmangia e lëvizjes natën dhe të pashoqëruar mbetët ajo çfarë ata mund të ndërmarrin për të minimizuar incidentet.
