TIRANË - Ndryshe nga të gjitha vitet e mëparshme, ketë herë provimet e Maturës Shtetërore do të zhvillohen më shpejt. Ministria e Arsimit dhe Sporteve, e cila ka publikuar këtë të mërkurë datat e 5 provimeve të maturës, ka shpjeguar se ky vendim është marrë për të mos penguar ata të rinj që duan të studiojnë në universitetet jashtë Shqipërisë. Gjuha e huaj do të jetë testi i parë për 52 mijë maturantët e këtij viti.
Ministria e Arsimit ka publikuar edhe guidën e maturantit një udhëzim i detajuar për të gjithë hallkat dhe procesin që duhen të ndjekin të rinjtë në mënyrë që të fitojnë degën që ata kërkojnë.
Ndërsa duke folur për kuotat e universiteteve, Malaj tha se, nuk janë përcaktuar. "Kuotat ende nuk janë përcaktuar se sa janë pasi është duke u punuar për këtë gjë. Nga kandidatët e vjetër janë 6 mijë maturantë që konkurrojnë sërish", tha ajo.
Ministria ka shpallur muajin prill muajin e këshillimit të karrierës, ku universitetet do të jenë të hapura për të pritur të rinjtë dhe t'i orientojnë ata për programet që ofrojnë dhe mundësitë reale që u ofron tregu i punës pas përfundimit të studimeve të larta.
DATAT E PROVIMEVE TË MATURËS JANË:
Gjuha e huaj - 19 maj 2014
Gjuha Shqipe - 30 maj 2014
Matematika - 9 qershor 2014
Provimet me zgjedhje - 18 qershor 2014
