TIRANË- Pas mbylljes së varrezës së Sharrës muaj më parë, sot është mbyllur edhe varreza e Tufinës pasi janë ezauruar të gjitha hapësirat për hapjen e varreve të reja. Bashkia e Tiranës akuzon qeverinë se nuk reagon ndaj shqetësimeve ndërsa Ministria e Brendshme thotë se ky probleme është mbartur nga qeveria e kaluar.
Njoftimi vjen nga Bashkia e Tiranës referuar Ndërmarrjes së Shërbimit Funeral.
Sipas njoftimit të bashkisë, ky shqetësim i është adresuar qeverisë shqiptare, që nga ana e saj nuk ka reaguar ndaj shqetësimit të ngritur për mungesën e hapësirave për varre të tjera.
Sipas Bashkisë së Tiranës, "mungesa e vendimit të qeverisë që i hap rrugën shpronësimit për interes publik bën të pamundur vazhdimin e kryerjes së ceremonive mortore në të dy varrezat publike të Tiranës në Sharrë dhe Tufinë."
Në këto kushte, drejtori i Shërbimit Funeral në Tiranë, Besim Kuka tregon se është i detyruar të gjejë zgjidhje emergjente duke hapur varre të reja në vende të papapërshtatshme, siç janë rrugët e varrezës dhe një pjesë trualli e cila rrezikohet nga rrëshqitjet.
Pas akuzave, Ministria e Brendshme ka reaguar ndaj Bashkisë së Tiranës, sipas së cilës qeveria nuk ka reaguar ndaj thirrjeve sa i përket shqetësimit për mungesën e hapsirave për varre në varrezën e Sharrës dhe të Tufinës.
Ndërsa sqaron se bashkia nuk është treguar korrekte në plotësimin e dokumentacionit për shpronësimin e truallit dhe zgjidhjen e këtij problemi, Ministria e Brendshme thotë se, "në qoftë se edhe Bashkia Tiranë do punonte me ritmin që punon kjo qeveri për qytetarët, ky problem sot nuk do ishte, e as Bashkia Tiranë nuk do kishte motiv për të bërë politikë edhe me varrezat."
