Marrëdhëniet e vërteta njerëzore janë të pazëvendësueshme për të ndërtuar një jetë të shëndetshme dhe të kultivuar.
Rëndësia e komunikmit sy në sy është e pakrahasueshme me atë çka na ofron jeta virtuale e imponuar gjithmonë e më shumë nga mjetet e komunikimit masiv apo teknogjia.
Sociologu Zyhdi Dervishi i argumenton këto fakte, duke theksuar se trendi i imponuar i një shoqërie individualiste ndikon në izolimin e njeriut dhe për pasojë edhe në sëmundje psikologjike.
Marrë shkas nga analiza e kulturologut italian Umberto Ecco në formën e letrës këshilluese ndaj nipit të vet duke përgjithësuar brezin e ri, sociologu Derivishi e shikon domosdoshmëri ushtrimin e kujtesës nëpërmjet leximit.
Sipas vëzhgimeve të profesor Dervishit studentët dhe të rinjtë shqiptarë kanë mangësi në aspektin kulturor të të lexuarit dhe interesit për të, prandaj ai e këshillon edhe të mësuarin përmendësh të një poezie si ushtrim të mirë për një jetë të shëndetshme.
