LEZHË -- Tre familje të cilat jetonin në të njëjtin kat të një pallati në lagjen "Beslidhja" të qytetit të Lezhës, në orët e para të mëngjesit të sotëm, kanë përjetuar momente tmerri.
Dy persona me maska dhe të armatosur kanë hyrë në banesat e tyre me qëllim grabitjen.
Tre familjet banonin në katin e tretë të pallatit, dhe apartamentit i kishin ngjitur me njëra tjetrën. Nga të dhënat e para grabitësit duhet të kenë pasur dijeni që në këto familje nuk ishin burrat, të cilët jetojnë në emigracion.
Ngjarja ka ndodhur rreth orës 02:00 e ditës së sotme (13 janar 2014).
Sipas dëshmitarëve mësohet se në dy prej banesave, janë dhunuar gratë, të cilat ishin vetëm në banesë, ndërsa bashkëshortët e tyre jetojnë në emigracion prej disa vitesh. Mësohet gjithashtu se atë natë në banesë nuk kanë qenë as fëmijët e dy grave.
Personat e maskuar u kanë marrë paratë, bizhuteritë dhe sende të tjera me vlerë.
Nga burimet e para mësohet se autorët kanë përdorur dhunë ndaj grave, të cilat kanë kundërshtuan grabitësit. Më pas janë larguar me sendet e me vlerë që kanë vjedhur, duke përfituar dhe nga errësira.
Mësohet se grabitësit kanë hyrë nga ballkoni i njërës prej banesave dhe më pas kanë bërë dhe grabitjen e dy banesave të tjera të cilat ndodheshin ngjitur me njëra tjetrën.
Policia ka shpresa për identifikimin e shpejtë të autorëve të kësaj grabitje pasi ata kanë harruar telefonat në vendin e grabitur. Mësohet se vlera e grabitur është e konsiderueshme.
Policia mësoi për grabitjen nga një telefonatë që iu bë rreth orës 08:00 të mëngjesit të sotëm. Ndërkohë që familjarët e marrë në pyetje janë shprehur se nuk kishin mundur të bënin denoncimin më parë të grabitjes, pasi grabitësit nuk i kishin lejuar duke i kërcënuar me armë. 4 persona shoqërohen në rajon, si persona të dyshuar për ngjarjen kriminale.
