LEZHË - Dy vëllezër në fshatin Manati të Lezhës jetojnë në një varfëri esktreme, pa shtëpi e të ardhura.
Në një rrënojë pa çati, pa dyer dhe dritare strehohen dy vëllezërit Ndreca në fshatin Manati të Lezhës. Jetesa e tyre është shumë e mundimshme dhe shpresat e tyre duket se kanë humbur tashmë.
Në shtëpi gjetëm vetëm njërin vëlla, Nikollën pasi vëllai i madh Mëhilli kishte shkuar që të tërhiqte pensionin e invaliditetit. Në Lezhë, Nikollën e njohin thuajse të gjithë si një njeri që ka nevojë për çdo gjë, por pak lezhjanë e dinë se ku ai fle, me çfarë ushqehet dhe jetesën e tij.
Ai tregon se jeta e tij dhe e të vëllait ka qenë dhe mbetet një kalvar mundimesh dhe që sot kërkon ndihmë nga të gjithë, e sidomos nga instancat shtetërore.
Banorët e zonës thonë se kjo familje nuk është ndihmuar nga askush dhe se jeta e dy vëllezërve vijon të mbetet në rrezik, pasi një pjesë e çatisë së banesës, ku ata strehohen, mund të shembet nga çasti në çast.
Kjo ishte një pjesë e kalvarit të mundimeve të përditshmërisë së dy vëllezërve Ndreca, e cila kërkon përkrahjen e shoqërisë dhe përgjegjshmërinë e organeve shtetërore për të ndryshuar mënyrën e jetesës së tyre, e cila është në kushte ekstreme.
