KORCE- Dhjetëra studentëve nga qyteti i Pogradecit të cilët kanë përfunduar studimet Bachelor dhe Master në degën Pedagogji në Universitetin "Fan Noli" të Korçës, u refuzohen diplomat nga drejtoritë arsimore.
Shqetësimi është ngritur nga 22 studentë, të cilët thonë se diplomat e tyre janë refuzuar me arsyetimin se nuk kanë marrë ende titullin "Mësues", duke ua hequr të drejtën e dhënies më pas të Provimit të Shtetit dhe gjetjen e një pune.
I menjëhershëm ka qenë edhe reagimi i Rektorit të këtij Universiteti, Gjergji Mero, i cili thotë se refuzimi i diplomave është bërë pa asnjë bazë ligjore.
Studentët kanë kërcënuar se tashmë do ta ndjekin këtë çështje në rrugë ligjore duke paditur drejtoritë përkatëse, atë të Pogradecit dhe të Ersekës.
