Nxënësit që kryejnë arsimin profesional, njohurit e tyre do ti zgjerojnë me punën praktike të cilën do ta realizojnë paralelisht me procesin e rregullt arsimor. Këtë e parasheh projekt ligji për ndryshimin dhe plotësimin e Ligjit për arsim dhe trajnim profesional i cili sot mori dritë jeshile nga Komisioni amë. Ministri Spiro Ristovski theksoi se dikasteri që ai drejton për zbatimin e suksesshëm të ligjit ka paraparë marrëveshje me odat ekonomike të vendit.
"Konstatuam nevojën për ndryshime të Ligjit për arsim profesional dhe trajnim, të cilat mundësojnë marrëveshje për punë praktike me nxënës aktiv, në periudhën adekuate me procesin e arsimit për të mos shkaktuar ngecje në sistemin e rregullt arsimor. Derisa nga ana tjetër nxënësit do ti siguroj punë praktike kualitative", tha Spiro Ristovski, ministër i arsimit.
Deputeti i LSDM-së opozitare Mitre Veljanovski, ndryshimet e propozuara të qeverisë në këtë fushë i komentoi me fjalën e urtë popullore serbe 'Janko arriti me vonesë në Fushë Kosovë'. Por, deputeti i VMRO-së Aleksandar Spasenovski, beson se projekt ligji do të përmirësoj gjendjen në arsimin profesional.
"Serbët kanë një fjalë të urtë popullore, e cila thotë 'Kasno stizhe Janko na Kosovo Polje'. Zoti ministër duhej që moti të ndërmerren hapa shumë më serioz në rast se vërtet do të dëshironim që në arsimin profesional të nxjerrim kuadro të përgatitur për tregun e punës. Kjo nuk do të jep absulutishtë kurrfarë efekti", u shpreh Mitre Veljanovski, deputet i LSDM-së.
"Vlerësoj se ky ligj do ta përmirësoj gjendjen. Mendoj se forcohet komunikimi mes ministrisë së arsimit dhe kompanive në Maqedoni, forcohet kontrolli ndaj atyre nxënësve që do të mbarojnë arsimin profesional dhe gjithë kjo do të sjellë një kualitet në arsimin profesional", deklaroi Aleksandar Spasenovski, deputet i VMRO-DPMNE-së.
Projekt ligji në fjalë në seancë plenare do të jetë pas pushimit vjetor të deputetëve, të cilët sot kishin ditën e fundit në Kuvend, nga nesër janë në pushim kolektiv i cili do të zgjas deri kah fundi i gushtit. Bedri Rexhallari
