Asociacioni qytetar 'MOST', ka vëzhguar periudhën para fillimit të fushatës zgjedhore dhe pas saj, dhe ka konstatuar disa shkelje të rregullave zgjedhore, të cilat, sipas drejtorit ekzekutiv të 'MOST'-it, Darko Aleksov ndikojnë mbi procesin zgjedhor. Në periudhën nga shpallja e zgjedhjeve, e deri te vërtetimi i listave të kandidatëve më 20 shkurt, partitë politike mbanin promovime të kandidatëve për zgjedhjet dhe programet e tyre, duke filluar kështu para kohe fushatën zgjedhore, ndërkohë që në Kodin Zgjedhor fillimi i fushatës është e përcaktuar saktë se fillon 20 ditë para ditës së mbajtjes së zgjedhjeve.
"Edhe pse formalo-juridikisht nuk bëhej fjalë për fillim të parakohshëm të fushatës zgjedhore, mendojmë se këto ngjarje në fakt kishin për qëllim promovimin e kandidatëve të ardhshëm, edhe pse të njëjtin ende nuk ishin të vërtetuar nga organet zyrtare.... Praktika e njëjtë vazhdon edhe pas vërtetimit të listave të kandidatëve, mirëpo deri më tani nuk është parashtruar asnjë denoncim deri te shkelësit nga ana e KSHZ-së. Në fushatën e deritanishme përsëri është vërejtur keqpërdorim i resurseve shtetërore dhe publike, përkatësisht shfrytëzimi i automjeteve zyrtare gjatë fushatës zgjedhore, prania e të miturve në tubimet parazgjedhore dhe shfrytëzimi i fyerjeve dhe përbuzjeve në paraqitjet publike të kandidatëve", tha Darko Aleksov, drejtor ekzekutiv i MOST.
Aleksov komentoi edhe vazhdimin e afatit për parashtrimin e listave për kandidatë deri më 8 mars në mesnatë duke theksuar se ndryshimet në fjalë nuk vlejnë edhe për kandidatët e pavarur por vetëm për partitë politike ose koalicionet partiake. Bedri Rexhallari
