RIMAT TI NASUDI NGA AYAT
Melvin Banggollay
Ti rimat ti ayat a napnuwan sudi
daluyon ti kinarag-o nga agsublisubli
Ta addaan kinas am-it a ma pagguadan
Ken sapata nga inggat panungpalan.
Ti ayat a nasudi pudno a naisupadi
Ta kinatarnaw na ket isu’t maikari
Nga mangnanam ayat a mapagpiaran
Nga din to agbalbaliw inton kaanuman.
Ti pudno nga ayat ket addaan kari
Nga napnuwan talged nga agserbi
Ken agsakripisyo uray isu’t pakatayan
Maidaton laeng ayat a mapagguadan.
Sisasagana a mang-ator iti napirdi
Nga dayag ken kari ti ayat nga nasudi
Sipud ta pudno unay puso ket sidadaan
Nga agpakawan ania man ti nagkurangan.
Rimat ken dayaw na dinto a mapundi
No adda dalluyon ti biag a makapirdi
Ta anges na ket ayat a kasasam-itan
A sidadaan nga agtuok ingat panungpalan.
MELVIN BANGGOLLAY
http://www.poemhunter.com/poem/rimat-ti-nasudi-nga-ayat/
