Седуммесечното бебе што во саботата вечерта беше оставено на хауба од автомобил во центарот на Скопје, закрепнува на Детската клиника. Лекарски тим се грижи за здравјето на малата Мевљан, која, според последните информации, е во добра здравствена состојба. Во меѓувреме, истрагата утврди дека таткото под дејство на алкохол го оставил бебето откако претходно се расправал со мајката, барајќи да проси со него. Полицијата ќе поднесе кривични пријави против несовесниот родител, а од Министерството за труд и социјална политика ќе почнат постапка за одземање на родителското право. Бебето ќе биде сместено во Домот за доенчиња во Битола.
Случајот со несреќното бебе ја растревожи јавноста. Според информациите од МВР, драмата се случувала во саботата по 23 часот. Мајката и таткото, кои живееле во невенчан брак, со седуммесечната ќерка се шетале по плоштадот „Македонија“. Таткото побарал да го земе бебето со себе и да одат да просат во околните кафулиња и ресторани. Бил пијан, поради што мајката не сакала да му го даде детето. Насилникот го грабнал бебето, жената почнала да вика, обезбедувачите од кафулињата се стрчале кон него, но тој побегнал. Недалеку го забележале случајни минувачи, на кои им било чудно што човек со качулка на главата трча со бебе во раце. Го прашале што прави. Таткото се исплашил дека ќе биде фатен, па стравувајќи од полицијата - го фрлил бебето на првиот автомобил до него и побегнал. Граѓаните ја пријавиле случката во Центарот за управување со кризи, бебето било однесено најпрво во Градската општа болница, каде што биле констатирани два хематоми на главата, а потоа и на Детската клиника.
Мајката дошла во полиција дури по 12 часа, тврдејќи дека цела ноќ се обидувала да ги најде бебето и сопругот. Станува збор за дисфункционално семејство, без постојана адреса на живеење. Преживувале питајќи по улиците. Таткото честопати се напивал, станувал агресивен и ја тепал невенчаната сопруга. Против него ќе бидат поднесени три кривични пријави, и тоа за запуштање малолетно лице, тешки телесни повреди при вршење семејно насилство и за загрозување на сигурност.
Од Министерството за труд и социјални работи ни изјавија дека ќе почнат постапка за одземање на родителското право на таткото, а ќе се утврдува дали има елементи за почнување постапка и против мајката.
„Стручен тим на Центарот за социјални работи ќе оствари разговор со медицинскиот тим на Детската клиника и ќе ја следи здравствената состојба на бебето, и веднаш штом закрепне и добиеме препорака од лекарите, ќе биде сместено во Домот за доенчиња во Битола“, е ставот на Министерството.
Од Првата детска амбасада во светот „Меѓаши“ алармираат дека институциите наместо да ги превенираат состојбите за заштита на децата, со нивните задоцнети реакции ги усложнуваат проблемите на децата.
„Задоцнета мерка е одземање родителско право кога детето ќе биде силувано или убиено од сопствениот родител“, предупредија од „Меѓаши“.
